بسم الله الرحمن الرحيم 

كانت فكرتني عن نفسي فكرة طيبة ، فكرة اني انسانه اعمل بالحديث ” من ترك شيئا لله عوضة الله خيرا منه ” ، والمؤمن كيس فطن ، والمؤمن القوي خير عند الله من المؤمن الضعيف ، كل هالأحاديث كانت قدام عيوني في اغلب الوقت

الحقيقة لوقت قريب كنت اعتقدت اني انسانه بعيدة كل البعد عن الخطا ، او بمعنى اصح [شكل معين ]من الاخطاء مااقع فيه ، كان عندي وعي كافي ونضج كبير وثقة عالية في نفسي ..

اعتقد اني وصلت لمرحلة الغرور اللي تمثلها كلمة ” مستحيل اني اسوي كذا ” ، ، ، او الشماته المغلفة بالثقة  ” اعوذ بالله ياربي لاتبلانا ” ..

فعلا يمكن وصلت لمرحلة مغرورة من الثقة في نفسي ، بدل الثقة في الله
والثقة بأن الله هو برحمته يحفظنا ويبعدنا عن بعض الذنوب والأخطاء كرم منه وفضل ومنه علينا وعلم بضعفنا .. الكبير

لكن لما نترك التوكل على الله ، ونعتمد على انفسنا بس ، بنوقع في نفس الخطاء وبطريقة غبية وسخيفة وتثير حتى شفقتنا عن انفسنا ..

لما خلاني الله اواجة ضعفي الحقيقي ضعفي الفطري ، اكتشفت شي هو بديهي اصلا بس غفلت عنه فعلا انه الحصن والحافظ هو الله عزوجل

استفت قلبك وان افتاك الناس وافتوك ( لي يومين هذا الحديث في بالي ) ، احس كل مره اغلط واقول لا انا قصدي كذا وقصدي كذا ، كاني وقعت في فخ التبرير لنفسي ، والتبرير لتساهلي مع نفسي .. لكن كان قلبي مو مرتاح لكل هذا ، كان قلبي يقول ياسمينه اني مو من هالنوع ، ولا ذا تفكير ولا هذي طريقتك ، قلبي من داخله يصرخ ياسمينه وين رايحة ؟ وش فيك ؟ هذي مبادئك وافكارك ؟ !

متأكدة بأني مدينة لربي بالكثير ، بس هذا الموقف على قد ماصدمني على قد ماكان صدمة خفيفة تعيدني للطريق الصحيح اللي كنت ماشية عليه

متأكدة اني مدينة لأبوي اللي اليوم بالذات اكثر من مرة داعا لي بطريقة خلتني احس ( بحزن ممزوج بفرح )  !

متأكدة اني مدينة لقلبي ولنفسي اللوامة  اللي ظلت تصرخ داخلي وتذكرني بطريق مشيت عليه وحثيت الكل يمشون على هالطريق … كنت اليوم بعيدة عنه

مدينة لاشخاص يمكن بدون قصدهم اعطوني صدمة خفيفة خلتني اراجع حساباتي ..

* إحنا مو ملائكة  بالعكس  بشر ضعفاء ، الخطا من طبيعتنا [ بس لازم نبعد عن تصنع المثالية ، والعناد عن الخطا ] .

** لان النفس اللوامة ، والضمير الدخلي ، على قد مو مزعج علينا نسمع صوته  ونصغي له ، في بعض الاحيان الضيق اللي داخلنا وقت الغلط هو ضيق المؤمن وصرخة الإنسان المستقيم من الطريق الوعر اللي ماشي فيه .. وغربة المعصية اللي ماتعود عليها ..

*** في بعض الأحيان [ يكون الخطا] هو السائد هو البرستيج ، هو الكول ، هو السبيشل ، وتحسين بلحظة انك لو ما كنتي مع هالركب متخلفة رجعية معقدة … بس مو مشكلة كوني كل هالأشياء ، اهم شي تنامين وضميرك مرتاح …

**** الأرزاق بيد رب العالمين ورب يسخرلنا مهما صعبت الظروف مين يساعدنا في طريقنا للرزق الحلال مهما كان صعب هذا الطريق ..

[ لان هالمدونه لي ، هي مرايتي وافكاري وعالمي الخاص ، هي ياسمينه بكل مافيها من خير وشر من صح وخطاء كتبت هالتدوينه مع انه بالمعايير السائدة [ بلاش فضايح ] وإذا غلط مو لازم يعني اسوي [ إعلان وإذاعة له] ، لكن حبيت ادون الجانب الثاني فيني [ الضعيف ] والمتندم عن الغلط  واللي يثبت انسانيتي [ اللي فيها خير وشر وصح وخطا ] وكلي رجاء [ انو اصحاب التاليف والتخريف والوساويس اصحاب العقول البوليسية ] مايفسرون التدوينه علي كيفهم – وإن صار فهذا في ذمتهم بيني وبينهم رب يعلم عني وعنهم  !

Popularity: 11% [?]

• عفوا ! لايوجد اي تدوينات متعلقة

No related posts.